Биыл Түркістан облысында түрлі салаларды цифрландыру мақсатында 29 жобаны жүзеге асыру жоспарланып отыр. Өткен жылы облыс көлемінде цифрландыру саласы бойынша 17 жоба іске қосылған болатын. Бұл туралы Өңірлік коммуникациялар қызметінде өткен брифингте облыстық цифрландыру, мемлекеттік қызметтер көрсету және архивтер басқармасының басшысы Елнұр Өтебаев мәлімдеді.
Сонымен қатар, ағымдағы жылдың соңына дейін 177 ауылдық округте электрондық құжат айналым жүйесі енгізілмек. Бұған қосымша қаражат талап етілмейді.
«Облыста мектепте оқитын оқушылардың қауіпсіздігін қамтамасыз ету үшін «Қазақтелеком» АҚ арқылы Түркістан және Арыс қалаларының 11 мектебінде бейне-камералар орнатылып, «қауіпсіз-мектеп» пилоттық жобасы жүзеге асырылып жатыр. Арыс қаласында 6 мектепке 135 бейне-камера, Түркістан қаласында 6 мектепке 162-сі орнатылды. Бұдан басқа, Түркістан қаласындағы №13 Науаи атындағы мектепке демеуші есебінен бір IT класс және бір STEM панель қойылды. Түркістан қаласындағы №27 мектепте турникет орнатылып, оқушыларға арнайы идентификациялық карточкалар таратылды. Сондай-ақ, Е-кітапхана жүйесі пилоттық жобада енгізілуде», — деді Елнұр Рахымбердіұлы.
Басқарманың ұйымдастыруымен биыл Түркістан және Кентау қалаларының 3-D модельдері құрылады және аэрофотосъемка жұмыстары толық аяқталмақ. Бұдан бөлек, қосымша салық түсімдерін арттыру мақсатында, цифрландыру құрылғыларының көмегімен арнайы алгоритм дайындалған.
«Біздің есебіміз бойынша облыс бюджетіне қосымша 2 млрд. астам қаржы түсіруге мүмкіндік бар және облыстың салық базасын толтыруға мүмкіндік береді. Сонымен қатар, Шардара, Мақтаарал және Жетісай аудандарында ауыл шаруашылығы мақсатындағы жерлерге космо-мониторинг жұмыстары да жүргізілді», — деді басқарма басшысы.
Бүгінгі таңда облыста 838 елді мекен бар. Оның ішінде 101 елді мекенде ұялы байланысқа мүлдем қол жетімсіз. Аталған мәселе бойынша облыстық Цифрландыру, мемлекеттік қызметтер көрсету және архивтер басқармасы салалық Цифрлық даму министрлігімен тиісті жұмыстар жүргізіп, «Билайн» байланыс операторы жыл соңына дейін 82 елді мекенге ұялы байланыс арнасын енгізбек.
Өткен жылы басқармамен қосымша 33 жаңа мемлекеттік қызметтер автоматтандырылған. Нәтижесінде облыстағы мемлекеттік көрсетілетін қызметтердің 91,2%-ы электронды жүйеге еніп отыр.