Шымкент қаласының тұрғыны екі жыл бойы азаматтарға «мемлекеттік бағдарламамен пәтер алуға көмектесемін» деп алдап келген. Алаяқтың арбауына 21 тұрғын түсіп, жалпы сомасы 34 млн ақша берген.

Алаяқтықты кәсіп еткен 27 жастағы азаматша қала аумағында соғылып жатқан көпқабатты тұрғын үйлерден танысы арқылы пәтер алып бере алатындығын алдап айтып, өзін жарнамалап, тұрғындардың сеніміне кіріп, ақшаларын өз пайдасына жаратып отырған.

Сондай-ақ, балдарына қарау үшін үйіне жұмысқа алған азаматшаның банк кәртішкесін қолдануға алдап сұрап алып, ұялы телефонына оның қосымшасын орнатып алған. Содан басқа жәбірленушілердің ақшалары осы кәртішкеге түскен. Ол жөнінде жәбірленуші білген сәтте полицияға арызданған. Бұдан өзге басқа жәбірленушілерден алған ақшаны кездейсоқ адамдарға өтініш жасап, банкоматтардан шешіп жүрген.

Үйді ала алмай, алданғанын білген тұрғындар полицияға арызданған. Тәртіп сақшыларымен жүргізілген жедел-іздестіру жұмыстары барысында, куәлерден жауап алып, сұрастыру жұмыстары жүргізіліп, банктік аударымдар тексеріліп, азаматшаның алаяқтық ісі дәлелденген.

Нәтижесінде қылмыстық істі жасағаны үшін азаматша 4 жылға сотталған.

Өз кезегінде тәртіп сақшылары азаматтарға алаяқтың арбауына түсіп қалмау үшін, бұрын соңды таныс емес бейтаныс тұлғаларға артық сенім танытпай, күмәнді қызмет ұсынысына ермеуіне шақырады. Үй мәселесі жөнінде арнайы мемлекеттік мекемеге жүгінуге кеңес береді.