Шымкент қаласының қылмыстық істер жөніндегі ауданаралық соты 28 жастағы жігітке қатысты үкім шығарды.Ол қаланың шет елді-мекендерінде мал ұрлығымен айналысты деп айыпталды. Бұл туралы Абай АПБ-на 4 жергілікті тұрғын ұқсас мазмұнды арызбен жүгінген. Олар үй жанында жайылып жүрген төрт түліктерін белгісіз біреу қолды еткенін айтып жеткізді.

Тәртіп сақшылары аталған жайтты ҚР ҚК-нің 188-1- бабы 3-бөлігі «Бірнеше рет жасалған мал ұрлығы» бойынша тіркеді. Оқиға орын алған маңды тексеріп, куәгер болуы мүмкін азаматтармен сөйлесті. Нәтижесінде, аталған қылмысқа қатысы бар деген күдікпен жергілікті тұрғынды ұстады. Тергеу барысында, жұмыссыз жігіт қаржылай мәселелерін шешу үшін осындай қадамға барғанын мойындады. Ол өзіне тиесілі «Mitsubishi Galant» маркалы автокөлігімен қараусыз жүрген малдарды ұрлап, сатып жіберген.

Полицейлер жинақталған іс-құжаттарды сотқа жолдады. Айыпталушы өз кінәсін толық мойындады. Ұрланған үй жануарлары заңды иелеріне қолхатпен қайтарылды. Сот 28 жастағы азаматқа қатысты 5 жылға бас бостандығынан айыру жазасын тағайындады. Естеріңізге сала кетейік, 2019 жылдың желтоқсанынан бастап мал ұрлығы ауыр санаттағы қылмыстардың қатарына жатады.

Өз кезегінде тәртіп сақшылары тұрғындарға төрт түлік малын қараусыз қалдырмауды ескертеді. Күнкөріс көзіне айналған жануарлар бірде қылмыстың құрбаны болса, енді бірде жол апаты жағдайларының себепкері болып жатады. Сондықтан полицейлер әртүрлі келеңсіз жайттарға жол бермеу үшін, қауіпсіздік шараларын күшейтуге шақырады.