Алматыда өз балаларын тұншықтырып, мәйітін тоңазытқышқа тыққан қаскөй ата-ананың соты басталды. Күдіктілер бастапқы жауаптарынан тайқып, судьяға басқаша түсініктеме берді. Яғни, қанішер әке егіздерді өлтіргенін мойындап, бар кінәні өзіне алған. Ал, әйелі Алла Волченконың қылмысқа түк қатысы жоқ деп отыр, деп хабарлайды Today.kz сайты «КТК» арнасына сілтеме жасап.

Эмиль Гильмутдинов егіз ұлдарын өлтіргенін жоққа шығармайды. Тіпті, адам сенгісіз қылмысты қалай істегенін өзі айтып берді. Сөзіне сенсек, бейкүнә сәбилерді арақтың буымен өлтіріпті. Әрі әйелімен арадағы ұрыс та себеп болған көрінеді. Негізі қаскөйдің о баста марқұм Салауат пен Ринатқа әкелік махаббаты болмаған. Өйткені, сәбилердің көзін жоймас бұрын, балалар үйіне тапсырмақ болыпты. Тек ешбірі қабылдамаған. Бар кінәсін мойындаған ол Алла Волченконы ақтап отыр. Яғни, әйелі қылмыстан бейхабар болған. Ал, бұған дейін, ұлдарды екеуінің келісіммен өлтіргені айтылған еді.

«Балаларды өлтіру туралы шешім қабылдағанда, миым істемей қалды. Оған қоса, әйеліммен ұрысып қалдым. Арақтың буы тағы бар. Болған жағдайдың жартысы есімде жоқ. Ұлдарды тұншықтырған соң, дірілдей бастадым, өкіндім, не істерімді білмедім», — дейді Эмиль Гильмутдинов.

Туған ұлдарының өлімі үшін айыпталып жатқан Волченконың өзі де сүттен ақ, судан тазамын дейді. Яғни, Эмиль Гильмутдиновтың арам пиғылы туралы мүлдем білмепті. Сол күні егіздер қасақана өлтіріліп жатқанда, ол үлкен ұлымен қыдырып жүрген. Дәмхана жағалап, арақтан аузы босамапты. Оны өзі айтып отыр. Сөйтіп, жалдамалы үйге түн ішінде қайтқан әйел сәбилерін іздемепті де.

«Келесі күні егіздерді сұрадым. Ол балалар үйіне тапсырғанын айтты. Мен ашулана бастадым. Кейін Эмиль мені арақ ішуге мәжбүрледі. Қорқытты. Артынша, өзіміздің пәтерге бардық. Егіздер онда да болған жоқ. Мазасызданып, айқайға бастым. Ал, ол тынышталмасаң, үлкен ұлды да өлтіремін деп қоқан-лоқы көрсетті», — дейді Алла Волченко.

Осылай бар кінәні азаматтық некедегі күйеуіне жапқан әйел бүгін марқұм сәбилерін еске түсіріп, жылап та алды. Сондай-ақ, Волченконың бұған дейін ұрлық үшін істі болғаны анықталды. Ал, Салауат пен Ринаттың өлімі туралы 4 күн өткенде ғана білдім деп отыр. Үлкен ұлдың қараусыз қалуына да Эмильді кінәлады. Болары болған соң, бұл екеуі өз-өздеріне қол салмақ болыпты. Бірақ, ойлары іске аспай, 12 қыркүйекте полицияға өз еріктерімен барған. Мұны прокурор да растады. Тек тергеу барысында ерлі-зайыптылардың бәрін бірлесе жасағаны дәлелденген.

«Ұлдарды өлтіру туралы ұсыныс жасаған  Гильмутдинов. Волченко бұған келіскен. Сөйтіп, екеуі ойларын жүзеге асыру үшін әдейі басқа үйді жалға алады. Егіздер өлтірілгенше, әйел үлкен ұлымен қыдырып жүріпті. Ал, Эмиль бірінші Салауатты тұншықтырған. Артынша, Ринатты өлтіреді. Кейін мәйіттерді сөмкеге салып алып, пәтерден пәтерге көшіп жүрген», — дейді мемлекеттік айыптаушы  Расул Есдәулетов.

Қылмыс қыркүйектің жетісінде болғанымен, тоңазтқыштағы мәйіттер 5 күннен кейін табылған болатын. Жағымсыз иісті бірінші көрші-қолаң сезіпті. Ал, маскүнем екеудің көшеге тастап кеткен үлкен ұлы қазір балалар үйінде. Оның алдағы тағдыры осы іс бойынша шешім шыққаннан кейін белгілі болады.