Шардара ауданында ағын су жүйелерін жаңғыртып жатыр. Арық-атыздарды тазарту жұмыстарына облыстық әкімдікке қарасты мекеме жауапты. Шардара ауданындағы су жүйелері соңғы рет жарты ғасыр бұрын тазаланыпты. Арық-атыздардың табаны лай бақпаққа толып қалған.

Түркістан облысының әкімі Дархан Сатыбалды Шардара ауданына іссапарында Көксу ауылдық округінің шаруаларымен кездесті. Әкім 10-ға жуық ауыл орналасқан бұл аумақтағы коммуналдық меншіктегі қашыртқыларды механикалық тазалау жұмыстарын қадағалады. Бұл каналда 30 жылдан астам уақыттан бері алғаш реш тазалау жұмыстары жүргізіліп жатыр.

Шаруалар су жүйелерінің тазаланғанына дән риза. Облыс әкімі жергілікті шаруалармен кездесіп, ұсыныс, пікірлерін тыңдады. Ауыл тұрғындары жылдар бойы қараусыз қалған су арналарының өткен жылдан бері тазаланып жатқанына алғыстарын айтты.

Тазалау жұмыстары бітсе, жердің құнарлығы артады. Көксу ауылында 500 гектардай жер іске қосылады. Жердің құнары артады. Өнімді де мол алуға болады.

Бүгінде ауданда қашыртыларды механикалық тазалаудан бөлек, каналдарды күрделі жөндеуден өткізу, тік дренаждарды қайта құрылымдау жұмыстары да қатар жүріп жатыр. Оған облыстық бюджеттен 4 млрд теңгеге жуық қаржы бөлінген.

Айта кетейік, Шардарадағы аталған ауылда 235 шақырым қашыртқыны тазалау жоспарланған. Ол жұмыстарды «Тұран су» ШЖҚ МКК бастап кеткен.

Облыс әкімі Дархан Сатыбалдының тапсырмасымен 2023 жылы Түркістан облысындағы су нысандарын қалпына келтіруге облыстық бюджеттен 4 млрд.теңге бөлінген. Оның ішінде ұзындығы 70 шақырым болатын 10 каналда күрделі жөндеуден өтеді. 18 шқ. құрайтын 6 қашыртқы толық қайта қалпына келтіріліп, үшеуіне ағымдағы жөндеу жұмыстары жүргізіледі. Нәтижесінде 12 мың гектар жердің сумен қамтамасыз етілуі және милиоративтік жағдайы жақсарады.

2024 жылға ұзындығы 63 шқ. болатын 11 канал күрделі жөндеуден өтеді. Ұзындығы 488 шақырым су арналары механикалық тазалау жұмыстары жүргізіледі.

Жалпы Шардара ауданында 959 шақырым су арналарын механикалық тазалау жоспарланған. Олардың дені мүлде тазалау көрмеген. Салдарынан егістік жердегі жер асты сулары дұрыс шайылмай, сор басып жарамсыз күйге түскен. Мыңдаған гектар суармалы жер қолданыстан шығып қалған.

Түркістан облысы ауыл шаруашылығы басқармасының «Тұран су» ШЖҚ МКК бүгінде өңірде ағын су мәселесін шешуде маңызды рөл атқарып келеді. Арнайы техникалар алынып, жаңа ғимараты бой көтерді. «Тұран су» шаруашылық жүргізу құқығындағы мемлекеттік коммуналдық кәсіпорынның балансында 18 су қоймасы, 3 су торабы, 3 магистральдық канал және 103 ішкі шаруашылық аралық канал бар.

«Тұран су» МКК тиімділігі басқа жеке ұйымдарға қарағанда 2 есе жоғары. Өңірдегі арықтар мен каналдарды тазалауда аталған мекеменің үлесі мол.

Түркістан облысы әкімінің баспасөз қызметі