Республика аумағында 15 желтоқсан мен 7 қаңтар аралығында жаңа жылдық мереке кезінде қоғамдық қауіпсіздікті қамтамасыз ету әрі заңсыз айналымдағы сертификатталмаған пиротехникалық заттарды тәркілеуге бағытталған “Пиротехника” жедел-профилактикалық іс-шарасы жүргізілуде.

Аталған іс-шара аясында Шымкент қаласы Полиция департаментінің қызметкерлері Төтенше жағдайлар департаментінің өкілдерімен бірлесіп рейдтік жұмыстар өткізуде.

Профилактикалық шара басталғалы тәртіп сақшылары пиротехниканы сақтау, тасымалдау мен пайдалану тәртібін бұзған және сертификатталмаған пиротехникалық өнімді сатқаны үшін 15 азаматты жауапкершілікке тартты. Олардан жалпы 128 пиротехникалық бұйымдар тәркіленген.

Полиция департаменті пиротехникалық бұйымдарды тиісті лицензиясы мен рұқсаты жоқ тұлғалардың ашық павильондарда, автомобильдерде, шатырларда, өтпелерде сатуына қатаң тыйым салынғаны туралы ескертеді. Сондай-ақ полицейлер мұндай фактілер анықталған жағдайда ҚР ӘҚБтК-нің 196-бабына сәйкес (Тауарлармен немесе өзге де заттармен заңсыз сауда жасау) жауапкершілік көзделгенін еске салады.