Қала аумағында жол-көлік оқиғаларының алдын алу және жол қозғалысы ережелерін өрескел бұзушылықтардың жолын кесу мақсатында өтіп жатқан “Қауіпсіз жол” іс-шарасының бірінші күнінде төленбеген айыппұлдары бар екі жүргізуші анықталды.

Мәселен, полицейлер ағымдағы жылдың 19-сәуірінде «Ваз-21014» маркалы ресейлік нөмірлі екі көлікті тоқтатқан. Тексеру барысында азаматтар бірнеше рет жол ережесін бұзып, айыппұл төлемегені анықталды.

«Жүргізушілердің жасаған бұзушылықтарының басым бөлігі ҚР ӘҚБтК-нің 592-бабы (қозғалыс жылдамдығын рұқсат етілген шектен асыру) бойынша тіркелген. Сондай-ақ, азаматтарға 600 мың теңгеден астам сомаға әкімшілік айыппұл бойынша берешегі бар екендігі туралы ескерту берілді. Осыған байланысты борышкерлердің көліктері айыппұлдарды толық өтегенге дейін арнайы тұраққа жеткізілді», — дейді Жергілікті Полиция қызметі басқармасының бастығы полиция полковнигі Ұлықбек Мылтықов.

Айта кететін ақпарат, осындай іс-шаралар жол-көлік оқиғаларының алдын алуға септігін тигізеді. Тәртіп сақшылары жол қозғалысының барлық қатысушыларынан жол жүру ережелерін қатаң сақтауды сұрайды.

Шымкент қаласы Полиция департаментінің Баспасөз қызметі